పళ్ళు ఊడటం అంత వీజీ కాదు!

చిన్నప్పుడు పళ్ళు ఊడితే కొత్తగా మంచి పళ్ళు వస్తాయన్నారు
ఇప్పుడు పళ్ళు ఊడితే టూత్ ఫెయిరీ వచ్చి గిఫ్ట్ యిస్తుంది అంటున్నారు
మనుమలు,మనుమరాళ్ళు
ఇప్పుడు నా పళ్ళు ఊడితే  డెంటిస్టులు పన్నుకు మూడు వేలు
పూర్తి సెట్టుకు ముప్పై వేలు అంటున్నారు
ఊపిరి ఆపబోయి పన్ను ఊడ పీకామని తలలు బాదుకుంటున్నారు
దిక్కు తోచని ఈ మాయదారి యమభటులు!!!

నేనెవరిని?

ఇంట్లో అందరూ తెల్లగా అందంగా వుంటారు
నేనొక్కదాన్నే సాదా సీదా
నేనెవరిని?
అన్నయ్యలు,అక్కయ్యలు ఎత్తిన పుస్తకం దించకుండా చదువుతారు
నాకేమో డాన్సులు,డ్రామాలు,ఉరుకులు,పరుగులు
నేనెవరిని?
ఇంట్లో అందరూ డాక్టర్లు,గజిటెడ్ ఆఫీసర్లు
నేనేమో చిన్నపాటి గుమాస్తాను
నేనెవరిని?
ఆఫీసులో మేనేజర్ తో అందరూ కరచాలనాలు,సలాములు
నాకైతే మేనేజరు,స్కావెంజరు ఒకటే
నేనెవరిని?
ఆడపిల్లలందరు సిగ్గుల మొగ్గలు,చిగురుటాకులు
నేనేమో కఠినంగా మగరాయుడిలాగ
నేనెవరిని?
అందుకేనేమో ఇంట్లో వాళ్ళకి black sheep of the family
బయటవాళ్ళకి fish out of water ని
భేష్!I welcome it!

అవును నేను ఆమ్మాయినే

అసలే అందగత్తెను కాను
ఇప్పుడైతే మరీను
అయినా నేను అమ్మాయినే!

అసలే ఛాయ తక్కువ
ఇప్పుడు మరీ ఎక్కువ
అయినా నేను అమ్మాయినే!

అప్పుడు పళ్ళు ఊడితే గట్టి పళ్ళు వస్తాయని ఆశ
ఇప్పుడు కట్టుడు పళ్ళదే మహర్దశ
అయినా నేను అమ్మాయినే!

అప్పట్లో నడుమును దాటే జడ
ఇప్పట్లో దాటనంటుంది మెడ
అయినా నేను అమ్మాయినే!

అప్పుడు కళ్ళలో మెరుపు
ఇప్పుడు ఒళ్ళంతా మతిమరుపు
అయినా నేను అమ్మాయినే!

అప్పట్లో నడవమంటే పరుగు
ఇప్పట్లో నడవడం ఎలాగు?
అయినా నేను అమ్మాయినే!

అప్పట్లో విల్లంబులా వంగితే గొప్ప
ఇప్పట్లో నిటారుగా నిలవాలంటే ...అబ్బ!
అయినా నేను అమ్మాయినే!

అప్పుడు అమ్మాయిని
ఆ తర్వాత అమ్మను
ఇప్పుడు అమ్మమ్మను,నాన్నమ్మను
అయినా నేను అమ్మాయినే!